MSAFARA wa Waziri wa Mambo ya Ndani ya Nchi, Dk. Emmanuel Nchimbi, umepigwa mawe na wananchi waliojitokeza kuzungumzia kero ya daraja la Matarawe, ambalo linadaiwa kusababisha vifo vya watu zaidi ya watatu mwezi Oktoba mwaka huu.Tukio hilo limetokea jana saa 10:00 jioni hadi saa 12:00, ambapo wananchi hao wakiwa na hasira walifanya fujo wakimshinikiza Nchimbi ambaye ni Mbunge wa Jimbo la Songea Mjini awasaidie kupanua daraja hilo ambalo kwa muda mrefu limesababisha kutokea kwa ajali za mara kwa mara katika eneo hilo.
Wananchi hao wa Kata ya Matarawe, Manispaa ya Songea, wakiwamo waendesha pikikipiki maarufu kwa jina la ‘yeboyebo’ walifunga barabara kwa zaidi ya saa mbili huku wakifanya fujo za kung’oa kingo za daraja, kuweka magogo na mawe katikati ya daraja na kuchoma matairi moto ili kumzuia kiongozi huyo asiweze kupita na atoe majibu ya kina juu ya daraja hilo.
Hatua hiyo ilililazimu Jeshi la Polisi kuwatawanya wananchi hao kwa kuwafyatulia mabomu ya machozi ili kukabiliana na uharibifu pamoja na kuruhusu msafara huo uweze kupita.
Aidha, kufuatia vurugu hizo, Jeshi la Polisi liliweza kuwashikilia watu wanane.
Hata hivyo Dk. Nchimbi alilazimika kusimama na kushuka kwenye gari lake akiwa ameongozana na viongozi mbalimbali wa chama na serikali akiwamo Mkuu wa Wilaya ya Songea, Joseph Joseph Mkirikiti, ambapo aliwapa pole kwa ajali zinazotokea huku akiwataka kuwa na subira wakati ombi lao linashughulikiwa.
“Natoa pole sana kwa msiba na ajali ambazo zimetokea nimewasikia, na ninaahidi nitawajengea daraja hili, kama nimeweza kujenga barabara hii kwa kiwango cha lami bila maandamano wala kufungiwa barabara nitashindwa daraja?” alihoji.
Nchimbi alisema kuwa vitu hivyo vinavyozungumzika hakuna haja ya kufanya maandamano na kuwataka wananchi hao kuhudhuria mkutano wake kwa kuwa anajua ufinyu wa daraja hilo na ameahidi kulifanyia maboresho zaidi.
Naye Diwani wa kata hiyo, James Makene, aliungana na kundi la wananchi hao na kumueleza Nchimbi kuwa hiyo ni changamoto ambayo wakazi wake wamekuwa wakilia kwa kipindi kirefu.
Aidha, Kamanda wa Polisi wa mkoa huo, Deusdedit Msimeki, alisema kuwa kufuatia vurugu hizo tayari watu wanane wanashikiliwa na wanaendelea kuhojiwa zaidi ili kuwabaini vinara wengine waliosababisha fujo hizo.
