Mkuu wa tume ya mabadiliko ya katiba ya Misri amemkabidhi Rais Adly Mansour wa serikali ya mpito ya nchi hiyo rasimu ya katiba mpya na hivyo kumpa fursa ya mwezi mmoja ya kuitisha kura ya maoni. Amr Moussa Katibu Mkuu wa zamani wa Arab League amekabidhi rasimu hiyo ya katiba mpya hapo jana siku tatu baada ya kamati ya watu 50 kukamilisha kazi yake ya kuiandaa.
Akizungumza na vyombo vya habari huko Cairo, Amr Moussa amewataka Wamisri wote kushiriki kwenye kura ya maoni na kuipigia kura ya 'ndiyo' rasimu hiyo. Amesema Misri inakabiliwa na vitendo hatari vya uchochezi ambavyo wanapasa kuvikomesha. Amr Moussa ametoa wito huo kwa wananchi wa Misri wa kushiriki kwenye kura ya maoni na kupiga kura ya 'ndiyo' huku rasimu ya katiba mpya ya nchi hiyo ikilizatiti na kulipa nguvu zaidi jeshi kimadaraka.
