Simba, Yanga baba yao mmoja

kwa mujibu wa mwananchi

Nurdin 

Na Calvin Kiwia, Mwananchi
Posted  Jumatatu,Agosti12  2013  saa 16:51 PM

Kwa ufupi

Sikutaka kuamini moja kwa moja. Nilichukua simu yangu ya kiganjani na kumpigia ili kuthibitisha ninayosikia mitaa kama ni kweli!

Nilipigwa na mshtuko, baada ya kusikia taarifa zimeenea mitaani kote kuwa ‘kiraka’ Nurdin Bakari aliyeanzia soka lake timu ya AFC ya Arusha na kuhamia Simba kabla ya kutua Yanga na kudumu miaka sita ya mafanikio, ameachana na soka la ushindani.

Sikutaka kuamini moja kwa moja. Nilichukua simu yangu ya kiganjani na kumpigia ili kuthibitisha ninayosikia mitaa kama ni kweli!

Jumatatu ya Julai 9, mwaka huu, muda wa saa 2 usiku, nilimpigia simu Nurdin kwa bahati nzuri alipokea simu yangu na kunikubalia tufanya naye mahojiano na kunieleza anakoishi Tabata kwa bibi karibia na Rufita.

Nilipofika kwake mfanyakazi wake wa ndani alitoka na kunifungulia geti nikaingia ndani na kumuona Nurdin akiwa amesimama kwenye mlango wa nyumba anayoishi akiwa amembeba mwanaye wa kike Salha, mwenye umri wa mwaka mmoja na kunikaribisha sebuleni kwake.

Nikaingia na kusalimiana naye huku akionyesha tabasamu la mbali. Mwanaye Salha pia alinisalimia kwa kuweka mkono wake kichwani kwangu, ambapo alikaa kwenye kochi na mimi nikakaa kwenye kochi lingine.

Swali la kwanza kwa Nurdin nilimtaka aniweke wazi kama ni kweli ameamua kuachana na soka la ushindani kama nilivyokuwa nikisikia stori mitaani.

Nurdin alionyesha uso wa kutabasamu na kunijibu. “Hizo ni habari zisizokuwa na ukweli wowote ndani yake. Soka ndiyo maisha na kazi yangu,” anasema Nurdin huku akiwa anamtizama mwanaye, Salha aliyembeba.

KUACHWA YANGA

Nurdin anasema amemaliza mkataba wake Yanga na hakuna anachoidai zaidi ya fedha za kutwaa ubingwa wa Ligi Kuu ya Tanzania Bara msimu uliopita.

“Binafsi bado najiamini nina kiwango bora cha kuendelea kuichezea Yanga, lakini chuki binafsi za viongozi zimefanya nishindwe kuongezewa mkataba wa kuendelea kuitumikia klabu hiyo,”

Nurdin anasema viongozi walimjengea zengwe na kumchukia baada ya kuwa mstari wa mbele kudai haki yake.

“Kama unataka kuchukiwa na viongozi wa Simba na Yanga dai haki yako. Utapigwa zengwe hadi utaachwa,” anasema Nurdin ambaye ambaye amejiungana Rhino Rangers ya Tabora.