Mugabe ameshinda urais kwa muhula wa saba

hakileo Rais Robert Mugabe wa Zimbabwe ameshinda kiti cha urais wa taifa hilo kwa muhula mwingine wa saba. Matokeo rasmi yanaonesha kuwa Mugabe ameibuka na asilimia 61 za kura dhidi ya mpinzani wake, Waziri Mkuu Morgan Tsvangirai ambae amepata asilimia 34. Tsvangirai amesema  uchaguzi huo wa rais na wabunge uligubikwa na vitendo vya udanganyifu na ametoa kauli ya wazi akisema atachukua hatua za kisheria. Amesema chama chake cha MDC hakitashirikiana tena na chama cha Mugabe, Zanu-PF. vyama hivyo viwili vilifanya kazi pamoja katika serikali ya muungano iliyoundwa 2008. Kwa upande wao Umoja wa Ulaya umeonesha wasiwasi wake kuhusu madai ya kufanyika mambo kinyume na utaratibu katika uchaguzi huo. Mugabe mwenye umri wa miaka 89, amekuwa rais wa Zimbabwe tangu taifa hilo lipate uhuru wake kutoka kwa Waingereza 1980.